中環出更：陳晴想當年當保母賺雜費
獲聯合國兒童基金香港委員會（HKCU）委任做大使嘅黃金寶，佢嘅成長故事充滿勵志性，不過唔講唔知，原來外表嬌滴滴，成個溫室小花咁樣嘅HKCU主席陳晴，一樣係喺風雪中成長。
落雪踩兩個鐘單車返學
唔好睇陳晴成長環境唔錯，細個佢喺北京讀書，同其他同學仔一樣，每日來回踩單車踩足兩個鐘返學，落雨都仲小事，零下幾度嘅落雪日子，一樣要照踩，凍到佢手腳同面珠都爆晒坼，不過因為爸爸一句唔可以同其他同學有唔同，結果幾難踩佢都照捱，後來去美國讀書，爸爸除咗交學費之外，雜費要陳晴自己搞掂，結果佢返學做助教教數學，放學就做保母湊三胞胎，一湊就三年，咁有經驗，難怪依家屋企得一個「大老闆」要佢湊，佢可以咁輕鬆啦。