中環出更：施氏兄弟開P賀雙喜
菁英會創會主席施榮忻（Jaime）細女施曉渝（Evelyn），眨吓眼一歲生日，咁啱得咁蹺，Jaime二哥、廠商會副會長施榮懷早前獲頒太平紳士，可謂雙喜臨門，施家前晚喺銅鑼灣海都酒家筵開三圍慶祝，施氏兄弟唔少老友都帶禮物到賀。
榮忻細女生日 榮懷做「紳士」
壽星女Evelyn穿上公主裙，頭戴大蝴蝶，由媽媽Jaymee抱住出場。Jaime訂製四層高生日蛋糕，又掛上愛女巨型海報，認真廿四孝。施家總動員出動，除Jaime爸爸、全國政協委員施子清伉儷外，三位哥哥、大女Victoria都嚟齊，Jaime外父外母更遠道由荷蘭返港出席宴會。
咁高興，菁英會兄弟班帶住大包小包禮物到賀，有人索性折現，封大利是。Evelyn人見人愛，主席洪為民、副主席楊華勇、莊家彬及梁宏正都被純真笑容融化，出盡法寶逗BB玩。委員林智彬就話要學定湊仔，見佢太太Tiffany腹大便便，原來BB下月出世，仲係男丁添，恭喜恭喜。
Evelyn仲細，生日蛋糕只可淺嚼輕嘗。相反，大人舉杯暢飲，相當Happy。施榮懷多咗個「紳士」稱號，心情靚爆滿場飛敬酒，菁英會榮譽主席白富鴻亦係出爐「紳士」，兩位互敬一杯，席上兄弟搞笑話，以後有乜冤情，搵兩位「紳士」申訴就掂嘞。
卓妮