立法會尋日辯論告別舊大樓，多名議員都寄語近年興起嘅爆粗掟嘢文化，可隨着搬到新大樓絕迹，但相信會事與願違。原定喺新大樓坐正掟嘢三人組前面嘅保險界議員陳健波，自言不堪壓力，決定與醫學界議員梁家騮調位，以免將來嚇到心臟病發。
前排我哋講過新大樓嘅座位編配，無論係開大會、財會定內會，由人民力量黃毓民、陳偉業同社民連梁國雄組成嘅掟嘢三人組，都係坐正喺「五散人」後面，將來佢哋要掟蕉、掟骨、掟飛機，或者大力拍枱拍櫈喪鬧特區高官，「五散人」都會食到正。其中坐喺長毛前面嘅陳健波，就笑言自己心血少，將來長毛突然從後大嗌，佢心臟未必頂得順，決定與梁家騮調位。
其實建制派好應該重新執位，將開會仲少過梁家騮嘅金融界李國寶同體育界霍震霆，安排坐喺黃毓民同陳偉業前面，將掟親人嘅機會減至最低。