新一屆區議會選舉將於十一月舉行，各黨派嘅疑似區選候選人，都各出奇謀爭取區內街坊支持，包括帶同一家大細出席活動晒溫馨。
年紀輕輕已有三個囝囝嘅民建聯深水埗區議員鄭泳舜（Vincent）就仲誇張，幫只得幾個月至三歲大嘅囝囝印製卡片周街派，而且仲有埋職銜添，就係佢哋爸爸嘅議員辦事處義工。
我哋日前喺一個酒會上撞到Vincent，見到佢滿場飛周圍同人派卡片，而且一派就三張，原來係派緊佢嗰三位「義工」嘅卡片。Vincent話咁做唔係想博宣傳，而係三個仔真係好得意，啲街坊又成日問起佢哋，所以先印嚟大家開心吓。
Vincent嘅黨友陳克勤收到該三張「義工」卡片後，即時鋪上facebook，並講笑話發現三個印有卡片嘅「童工」，大讚Vincent真係好強喎。
其實克勤仔仲大過Vincent好幾年，人哋仔都生咗三個，佢就連婚都仲未結，與其羨慕人哋，不如努力啲急起直追喇！