中環出更：賢慧社換屆名媛拱照陳仲尼
由香港青年聯會姊妹團組成嘅「賢慧社」，七月一日跟隨青聯換屆，前主席彭芷君（Gi Gi）升呢做榮譽主席，佢嘅主席之位就由家族從事酒店及物業投資嘅羅詠詩（Anthea）接棒。保良局副主席梁寶珠千金林玉茵（Maya）、名媛鄭詩韻（Michelle）及青年創業家周沁齊三人就榮升做副主席，靚女陣容鼎盛，為新一屆賢慧社出力。
卸任主席嘅Gi Gi飲水思源，為答謝好姊妹及前青聯主席陳仲尼（Rock）嘅支持，上周五喺蘇浙同鄉會搞咗個上海菜飯局。當晚阿Rock置身廿幾位女士當中，令餐飯變成「美女伴月飯局」，佢笑言感覺飄飄然，受寵若驚喎。Gi Gi即場送上一個阿Rock嘅Q版公仔，背景貼滿賢慧社嘅美女相，確係物輕情意重。
彭芷君卸任想瘦身
Gi Gi卸任賢慧社主席後，就會做廿四孝媽咪，陪老公及囝囝去加拿大多倫多上暑期班，佢自嘲好肥，要趁機做運動減磅喎。至於卸任青聯主席嘅阿Rock，佢最想充電，所以七月底會飛美國西岸，陪囝囝上遊學團。佢早前獲頒銅紫荊星章，收恭賀短訊都收到手軟，正式賀電亦有逾五十封。
Michelle都計劃八月拖埋老公同兩個囝囝去新加坡出差，但點知訂好機票先至發現，三個月大嘅細仔原來未有護照，日前晨早七點去灣仔入境處排隊攞證。當晚卓妮見到Maya拎住新款Hermes螢光粉紅色手袋，原來係早前遊巴黎公幹時的戰利品，佢話計落平香港一截。
卓妮