探射燈：短期舖不擇手段求散貨
二手教科書店為求生存，無不各出奇謀，由出動青春少艾「拉客」、贈送禮券、飲品，到推出「二人同行優惠」，甚至發展網上舊書買賣及租書服務，可謂各顯神通。不過，有業界人士表示，二手教科書市場正在走下坡，即使有生意亦考慮退出。
售賣二手教科書近十年的阿華（化名）透露，現時二手教科書市場被「短期租約舖」入侵，長期舖的生存空間逐步被蠶食，例如旺角，目前只餘下兩、三間長期售賣二手教科書的店舖，「佢哋（短期舖）成本低，又有背景，長期舖點夠爭？」
破壞行業形象
他指，「短期租約舖」目的在於趁暑假舊書買賣高峰期賺個盆滿缽滿，故部分短期舖會不擇手段，「佢哋會賣唔啱版嘅書呃人，賺完錢就閂舖走人，市民追都冇得追，市場秩序就係畀佢哋破壞晒，愈嚟愈多人覺得我哋呢行呃人！」
阿華提醒欲購買二手教科書的市民要小心選擇商舖，並坦言即使營業額不俗，他亦開始感到心灰意冷，「暫時我哋都仲頂得住，但如果畀其他短期舖騷擾，我就一定唔做！萬一長期舖執晒，家長真係要自求多福。」