中環出更：蔡太孖囝囝遊敦煌特窟
讀萬卷書不如行萬里路，中華總商會會長蔡冠深太太蔡關穎琴，早前就同啱啱考完英國GCSE嘅囝囝蔡卓思去敦煌同西安見識，今次嘅旅程並唔係水過鴨背式嘅走馬看花，而係真係可以「觸摸」當中嘅文化，卓思喺七日裏面，由抗拒到愛上中國文化。
不對外開放
本身係律師嘅蔡太，既要幫老公手，又要做公職，不過幾忙都好，五個寶貝仔女都一定係最優先獲得分配時間嘅！上年囡囡考完會考，佢就同囡囡兩個去歐洲鬆一鬆，今年輪到老三考完會考，佢就帶囝囝去睇古蹟，瀏覽咗敦煌卅八個洞窟，其中十個仲係特窟，即係唔對外開放、唔係人人都有得睇嗰啲呀！
其實身為中國人，有機會認識到敦煌嘅歷史文化真係好難得，所以今次蔡太特登安排無修歷史嘅老三出發，初時囝囝都覺得無咩興趣，不過愈睇就愈投入，仲睇得好仔細添，佢哋由敦煌返西安嘅時候，負責今次文化之旅嘅導師仲畀咗一個功課佢哋做，老三居然攞到八十幾分，搞到蔡太喜出望外，事關佢事前一路擔心囝囝會唔合格呀嘛！