內地孕婦湧港產子引發風波不斷，港府制訂政策一廂情願，結果搞到七國咁亂，一敗塗地。
港府大石砸死蟹，要求私家醫院明年預留七千個名額，接收港人內地妻子來港產子，好似皇恩浩蕩咁，可惜中港家庭並唔領情，誓要抗爭到底，討回公道。有人甚至正申請法律援助，準備提出司法覆核，挑戰當局暫停接收非本地孕婦嘅措施。
仲記得嗎？早排有港人內地孕婦圍堵食衞局局長周一嶽座駕，高舉「我要床位生ＢＢ」標語當街跪低，呢位問責高官竟然詐睇唔到，無動於衷。好啦，終於有人忍唔住打官司，睇吓周一鑊今次仲可唔可以詐傻扮懵，好戲睇怕陸續有嚟。
港人內地妻子來港產子個案，每年大約有六千幾宗，當局要求私家醫院預留七千個名額，表面睇係足夠嘅，問題係，私家醫院收費昂貴，郁吓都要十萬八萬，有啲醫院仲趁火打劫，大幅提高收費添。講真，中港家庭唔少係基層市民，咁大筆使費簡直係天文數字，點負擔得起吖。周一鑊呢招不過係虛應故事，敷衍市民，根本解決唔到問題，擺明係搵笨。
弊在連私家醫院都畀周一鑊搵笨，當局要私院包晒全數七千名中港家庭孕婦，又唔肯提供統一核實孕婦身份嘅方法，講白啲就係將可能產生嘅法律責任統統卸畀私院，彩自己攞，鑊就人哋孭，仲唔係搵笨？再講，如果私院以無法核實身份為由拒絕接收，到頭嚟最受影響嘅咪又係中港家庭孕婦，咁搞法唔止係搵笨，直頭係靠害添吖。
成件事搞到一鑊泡，完全係因為周一鑊當初做嘢唔經大腦，為求方便一刀切限制內地孕婦來港產子，遇到強烈反對先至改口話「法外有情」，最初要求私院預留三千個分娩名額，畀人狂炳之後又加到七千個。港府反口覆舌，朝令夕改，誠信早已破產！
其實本報早就點醒當局，應將孕婦分為三類，第一類係嬰兒父母都係香港人，享有優先權；第二類係港人內地配偶，應該區別對待；第三類嬰兒父母都唔係港人，必須受到限制，先到先得。弊在周一鑊正一係牛皮燈籠，點極都唔明。
話到尾，內地孕婦湧港產子，淨係限制名額根本無濟於事。係人都知，問題根源係終審法院當年判決非本港居民在港所生子女擁有居留權，於是吸引內地孕婦蜂擁而來，而當局又遲遲唔制訂相應嘅人口政策同措施，導致問題不斷惡化，卒之變成今日呢個無法收拾嘅殘局。
計功夫茶話齋，小修小補盞嘥心機，要徹底解決問題，必須對症下藥，徹底檢討並堵塞法律漏洞，以及制訂長遠人口政策。可惜，跛腳鴨政府等收工，邊個肯做嘢吖！