夕陽政府施政倒行逆施，力撐政府嘅建制派經常變成「炮灰」，尤其係近期替補機制一役被政府玩殘，甚感不滿。中聯辦主任彭清華尋日就邀請佢哋上深圳紫荊山莊會面同午宴，擺明就係安撫。大批記者蜂擁趕到現場守候，喺酷熱天氣下乾曬，都咪話唔慘。就喺等候期間，有份出席嘅中總黃宜弘（Philip）就主動邀請在場記者到佢嘅深圳別墅食午飯。
Philip喺開會期間致電司機，再叫司機將電話交畀在場其中一名記者，講明只要大家願意的話，佢個司機可以接送大家到佢深圳別墅食午飯。不過，呢個會面咁重要，話唔定有重大事情發生，大家又點敢擅自離開崗位吖，於是好客氣即時婉拒Philip嘅好意，最後Philip諗咗個折衷嘅辦法，就係叫佢個司機出去買外賣飯盒畀大家食。
事後有人猜度，點解Philip開開吓會忽然想請記者食飯呢？係咪想用調虎離山之計引開啲記者呢？抑或想記者知道佢深圳有間別墅呢？抑或純粹一番好意？究竟乜嘢原因，咁就真係要佢自己先至知喇！