政情：吳永嘉硬啃競爭法守則
惡評如潮嘅《競爭法》草案受到商界極力反對，最近政府推出競爭法守則諮詢文件，又係令人睇到眼火爆。中華廠商聯合會副會長吳永嘉（Jimmy）話，守則用咗幾十張紙界定乜嘢叫做市場行為，佢睇完都覺得好複雜，忍唔住為中小企抱屈話，跨國集團可以花錢畀專業人士去消化守則啫，但係中小企邊有能力同資源去遵守呢？
廠商會政治事務委員會舉行嘅免費專業諮詢服務計劃，尋日輪到喺大埔區舉行，身為廠商會政治事務委員會主席嘅Jimmy，頂住酷熱高溫入大埔，認真有心。講起佢代表廠商會同政府反映競爭法意見嘅工作進展，佢話上周同商務及經濟發展局局長蘇錦樑（Greg蘇）首次會面，Greg蘇嘅態度冇前局長劉吳惠蘭咁強硬，仲話具爭議性嘅條款有得傾喎。