政情：周澄大敗無緣進身校董
有「民主小女神」之稱嘅中文大學年輕校友周澄參選中大校評會選舉，期望成為校董影響校政，佢尋日一改平日小背心性感裝束，以密實黑色連身裙、黑框眼鏡嘅斯文look拉票，但最終都係以四百六十三票，大敗給一千四百零五票嘅資深校友、商人陳志新，無緣進身校董。
中大校評會尋日投票選出主席及常委，拉票時陳志新與周澄口舌交鋒，陳志新自詡「實幹、不靠口號」，又話自己意見不空泛，周澄反駁校內反對聲音唔單止不空泛，反而可以填補校評會職能。其實尋日會議都幾混亂，唔少校友就會議程序等問題互相嗆聲，又有校友報警報稱被打，結果原定三小時嘅會議開足近五小時。
周澄跟拍檔李達寧各只得四百多票落敗，她事後話「從來無諗過會成功」。會議期間又有校友提案要求中大校方撤回就民主女神像事件的政治中立言論，最後獲過半數通過，但陳志新就投咗反對票，佢話中大有自己嘅管治方針，難定對錯喎。