政情：棠哥受委屈 保護嫻姐
日前我哋寫過工聯會有意趁專業會議議員梁美芬（鼠王芬）喺替補機制一役做咗過街老鼠，重新考慮派人參加立法會九龍西直選。其實講到力撐當局立法杜絕「變相公投」，工聯會都係始作俑者之一，只係撐得冇鼠王芬咁出位同肉酸啫。據聞身兼行政會議成員嘅工聯會會長鄭耀棠，近排多次公開高調回應替補機制，目的正係要保護旗下嘅一眾現任議員，尤其係準備參選超級區議會議席嘅陳婉嫻，避免佢哋畀人玩殘，影響選情。
政府喺上周一下午正式宣布押後表決替補惡法，之前言之鑿鑿話唔會做「變色龍」嘅棠哥，咁啱得咁蹺喺當日上午舉行咗個記者會講房屋問題，並一百八十度「轉軚」呼籲政府押後表決，令人質疑佢係預先收到風政府將會「跪低」，先至借有關場合搶先「倒戈」。有工聯會中人就為棠哥呼冤，踢爆佢的確係收到風先決定舉行該次記招，但唔係同替補機制有關，而係聽到政府將會對置安心計劃及復建居屋作出改動，想搶先一步提出類似嘅建議，製造工聯會成功爭取政府讓步嘅形象。
為選戰鋪路 用心良苦
不過亦有政界中人指出，照計呢啲成功爭取嘅好消息，理應留番畀啲將會參選區議會同立法會嘅會員、尤其係一直力撐復建居屋嘅嫻姐公布，毋須出動到棠哥。事實上自從替補爭議愈煲愈大後，之前極為高調嘅嫻姐突然失咗蹤，令傳媒無法直接問佢對替補機制嘅睇法。直至政府宣布「跪低」押後表決替補法案，嫻姐先至現番身，出席前日嘅工聯會食物安全問題記者會，但問及對替補機制嘅睇法，佢就不斷耍手擰頭，叫記者直接問番棠哥喎。
我哋之前都有報道過，多名草根派泛民議員，包括職工盟李卓人、街工梁耀忠、公民起動何秀蘭、社總張國柱、以及前公民黨立法會議員張超雄等，正密鑼緊鼓籌組香港工黨，擺明就係想搶工聯會嘅勞工基層票，其中李卓人更加可能跳離新界西，轉戰超級區會，硬撼嫻姐。工聯會為咗保護嫻姐，避免佢捲入今次嘅替補爭議，惟有將佢暫時「收埋」，犧牲唔使參選嘅棠哥做擋箭牌，真係用心良苦喇。