中環出更：希臘示威 陳曾麗娜提前返港
希臘雅典特殊奧運會已經圓滿結束，卓妮日前遇到微笑行動前籌委會主席陳曾麗娜（Sally），原來佢同老公都獲邀參加雅典特殊奧運會嘅開幕儀式，支持香港運動員，原本諗住頭尾去四日，點知最後第三日就要離開，事關遇上當地有罷工示威，為免有危險，就算Sally唔捨得都要提早返港。
特殊奧運開幕晚宴喜逢姚明
Sally去年都有同老公到希臘坐郵輪暢遊小島，但同今次氣氛好唔同，畢竟當地經濟差、債務重，巿民難展笑顏，而且紛紛上街遊行宣洩，所以為免危險，決定提早離開。雖然要早走，但係都無損佢哋嘅心情，尤其係喺開幕禮上，見到香港在內嘅傷殘運動員進場及發言，令佢大受感動，加上喺開幕晚宴上遇到籃球好手姚明，乜都抵番晒啦！
為咗把握離開前嘅寶貴時間，Sally都有到當地嘅跳蚤巿場，買咗好多古董銀器及土產，佢話如果冇示威嘅話，希臘真係一個好值得去嘅地方。不過，今年做咗馬主嘅Sally，嚟緊要陪老公去揀馬，又要幫另一個慈善團體做籌款主席，所以睇怕今年要去重遊舊地都難啲喇。