中環出更：米蘭睇騷 李三元喜遇時裝泰斗
去歐洲睇時裝騷，唔單止係女士嘅專利，好似東華三院前主席李三元，最近都獲邀到意大利米蘭參加男裝時裝周，仲喺晚宴同「DG」嘅靈魂人物Domenico Dolce聚頭，同場又遇到「宇宙最強」甄子丹夫婦，認真難得。
去過米蘭睇時裝騷嘅人都會知道，時裝周座位好有限，可以獲邀入去睇騷真係一票難求，投身社會工作無耐就已經迷上DG嘅李三元，鍾意DG嘅剪裁同佢個人身形好配合，西裝唔使點樣修改就著得，所以咁多年都一直捧場，大家關係咁友好，所以每逢開騷，都會獲DG邀請。
不過，李三元懶出門，尤其係以前忙住打理盤生意，唔係成日行得開，但依家大仔都返咗公司幫手，如今出門都唔使心掛掛，咁啱今年又撞正去開巴塞隆拿旅行，可以喺回程時順道過米蘭睇時裝騷。
樂見學生衝出校園
睇完DG之後，李三元又去捧另一個「飛弗」牌子Gucci，仲遇到一班清華大學學生，原來Gucci贊助優秀嘅清華設計系學生過去睇騷，仲畀佢哋着返自己嘅設計喺會場出現，見到啲學生可以衝出校園，李三元都覺得好感動喎。
卓妮