「倒行逆施」，本來係形容港府嘅施政，但原來扶手電梯都有呢個問題。功夫茶真係有啲擔心，港府施政逆民意而行，港人就話可以上街用人民力量逼佢就範啫，之但係扶手電梯變奪命陷阱，真係防不勝防㗎！
唔講唔知，香港對扶手電梯安全嘅監管，可以講係一片空白，亦即係無王管咁解。呢，多年前，本港連環發生升降機斷纜事故，升降機竟然分分鐘變身跳樓機，嚇到當局即刻補鑊，推出升降機扣分制。哈，衰得佢吖，扣分制原來係「一梯兩制」，只係升降機受監管，扶手電梯就無人過問，留低一個大漏洞，成為無處不在嘅安全陷阱。
所以話，香港冇發生類似北京地鐵嘅奪命扶手電梯事故，都算係上天保佑咯。根據統計，全港現時共有八千部扶手電梯，幾乎梗有一部喺左近，最攞命係，質素監管毫無保證，只要任何一部唔生性，京鐵慘劇隨時喺香港上演，諗起都得人驚。
得人驚嘅唔只扶手電梯，仲有後知後覺嘅機電工程署，京鐵發生奪命慘劇後，該署至聲稱研究將升降機扣分制擴至扶手電梯，最快下一季推出，日後嚴重違規嘅電梯承辦商將被警告喎。至於十個港鐵站七十八部同京鐵事故同型號嘅扶手電梯，機電署官僚話，已指令港鐵全面檢查，全部運作正常，毋須停用。
本來呢，機電署後知後覺，總好過唔知唔覺嘅，市民日日與電梯同行，有監管梗係好過無監管啦。之但係咁，當局准許港鐵繼續使用呢批與京鐵事故同型號嘅扶手電梯，咁就令功夫茶好懷疑，港產官僚可能喺冷氣房吹得冷氣多，吹到大腦麻痹，連最基本嘅逃避危機意識都遲鈍過人。
嗱，京鐵發生電梯奪命事故之後，北京全市即刻停用呢種電梯，等待進一步檢查。唔好唔記得，港鐵美孚站日前有扶手電梯冒煙，驚嚇全港，出事電梯就係同一型號，當局憑乜嘢拍心口話唔會有下次？
同一型號產品喺同一時期相繼出事，正常人嘅反應梗係暫時停用，以保安全啦，正所謂不怕一萬，只怕萬一吖嘛。可惜港產官僚與正常人唔同，佢哋大安旨意，究竟係個腦唔正常，定係天生冒險精神特別旺盛呢？點講都好，佢哋有冒險精神係佢哋嘅事，但千祈唔好搵市民嘅安全較飛吖！