立法會嚟緊暑假就會搬往添馬艦新立法會大樓，告別有近百年歷史嘅舊立會大樓。各黨派議員都好唔捨得，話晒都留低唔少口水花，所以決定喺下周三開始一連幾日嘅本年度最後一次大會，加插一項「告別立法會大樓」嘅議案，畀大家抒發吓喺舊大樓工作多年嘅甜酸苦辣同難忘回憶。
雖然政府已經跪低押後表決替補機制法案，但下周三嘅煞科大會，仍有一大堆議程要處理，最保守估計都要傾兩日，依家加埋呢項告別舊大樓議案，極可能要傾埋第三日（十五日），睇怕會同原定喺當日下午舉行嘅特首答問大會撞期。
不過，為免煲呔曾又有藉口迴避議員質詢，立會最後決定如果到十五日中午仲未完到會，就乾脆暫停會議，先如期舉行答問大會，等插完煲呔曾之後先再復會討論餘下議程。可見班議員除咗唔捨得舊大樓外，亦唔想放過喺搬屋前再插多一次煲呔曾嘅機會，為佢哋喺舊大樓嘅回憶再添一筆！