政情：陳正欣嫌iBond數量小
依家通脹有幾高？唔使等政府公布，睇下平日嘅衣食住行使費多咗幾錢就知，雖然政府計劃發行三年期通脹掛鈎債券iBond，票息將按浮息或定息兩者中較高水平釐定，但唔少名人都認為發行數量小，對抗通脹幫助不大。保良局總理陳正欣（Daniel）表明唔會買，雖然風險低兼有助抗通脹，但數量實在太小，所以唔想同人爭，如果政府將來加碼的話，到時再考慮喎。
杯水車薪 難抗通脹
立法會議員梁君彥對iBond都甚感興趣，佢話計過條數後都覺得iBond可以同通脹掛鈎，都買得過嘅，只可惜數量太小，想買都買得唔多。咁又係嘅，今次發行額不多於一百億元，以每手入場費一萬元、一人一手計算，最多都係一百萬人受惠，就算幸運抽中一手，都抗唔到幾多通脹啦，睇嚟政府有心利民紓困就真係要諗諗發行多啲先至掂，否則杯水車薪都係枉然。