政情：毓民發起尋「鼠」運動
當今香港網絡大紅人，非專業會議立法會議員梁美芬（鼠王芬）莫屬，佢自從早幾日因為派發疑似「成功爭取押後替補機制」嘅傳單被網民炮轟後，呢幾日一改高調作風，「潛水」唔肯見人。一直唔妥鼠王芬嘅人民力量立法會議員黃毓民尋日就話，要發起尋人運動，誓要搵番鼠王芬出嚟喎。
尋日立法會開內務委員會及財務委員會，一向出席率唔差嘅鼠王芬竟然又再無影無蹤，不禁令人擔心，到底佢為乜要周圍避呢？但無論點都好，相信佢都唔縮得好耐，因為毓民尋日謔稱，好多立法會男議員都勁掛住佢，所以佢徇眾要求，發起「尋找失去的鼠芬」運動。
所謂禍不單行，有網友尋日重提舊事，將鼠王芬今年五月誤稱三皇五帝時期「大舜係大禹Daddy」呢件軼事攞出嚟講，大事揶揄一番，仲不斷喺社交網站facebook上面熱傳添。另外，「我相信有10萬人不想梁美芬再當選議員」群組尋日已經去到近二萬四千人喇，有網民質疑有五毛黨亂開群組分散參加人數，呼籲大家唔好中計喎！