政情：7‧13前鬍鬚曾避走加國
夕陽政府施政醜聞排山倒海，某位高官上個星期畀人鬧到變咗過街老鼠，可能隔一、兩個星期，就有另一批高官爆出其他更大單嘅醜聞，一單冚一單，簡直消耗議員同市民嘅有限記憶力。之前畀「史上最廢」預算案、派錢混亂及政治干預葛輝等醜聞纏身嘅財爺鬍鬚曾，就趁住班高官同事捲入替補機制醜聞，喺「７１３」包圍立法會嗰幾日遠飛加拿大，甚至連特首答問大會都缺席撐場。
雖然政府已經喺民意壓力同建制派集體「倒戈」下，被迫「跪低」押後表決替補機制，但社會嘅民怨怒火未有因而熄滅，其中人民力量就發動三千人喺下周三包圍立法會三日，誓要迫使強推替補惡法嘅煲呔曾、律政司司長黃仁龍同政制及內地事務局局長林瑞麟下台，加上唔排除亦有網民聲討喺事件中抽水嘅「鼠王芬」梁美芬，到時中區一帶交通隨時再次癱瘓，甚至會演變成騷亂暴動。
葛輝議案搵Greg蘇擋箭
其實呢次立法會本年度嘅煞科大會，本身仲有好多值得市民關心嘅議題，包括帳委會東亞運混帳醜聞調查報告，議員必定鬧爆負責嘅民政事務局局長曾德成。大會仲有由民主黨副主席劉慧卿提出，要求引用《立法會（權力及特權）條例》徹查葛輝事件嘅議案，後者矛頭直指涉嫌政治干預政府招標程序嘅鬍鬚曾。
不過，鬍鬚曾尋日透過新聞處發稿，宣布將於下周一至周五出訪加拿大三個城市，與當地官員同商界會面，擺明懶理「７１３」包圍立法會行動，並將特權法查葛輝議案，交由新上場冇耐嘅商務及經濟發展局局長蘇錦樑負責答辯，真係好帶挈。
至於喺「７１５」舉行嘅特首答問大會，泛民主派尋日就事先張揚，會喺場內場外夾擊煲呔曾，傳統上各名司局長會喺立法會內排排坐傍住老闆，但佢「哎吔細佬」鬍鬚曾屆時應該仲喺飛機上面，趕唔切返港撐場，真係夠晒團隊精神囉！