相信大家都記得八達通公司出賣二百萬客戶私隱，埋沒良心大發不義之財，後知後覺嘅特區政府終於出手做嘢嘞。
政制及內地事務局向立法會提交文件話喎，近期某些企業轉移大量顧客個人資料予他人作直銷用途，而未徵得顧客同意，引起社會關注。為讓當事人選擇是否容許他人將個人資料用於直銷，當局建議引入選擇機制，要求資料使用者向當事人提供書面資訊，當事人三十日內冇表示反對，先至可以使用相關資料。如果未經當事人許可而出售個人資料圖利，最高可被罰款一百萬元以及監禁五年。修訂《個人資料（私隱）條例》草案今日刊憲，下周三於立法會首讀同二讀。
其他具體細節請恕功夫茶唔同大家囉囌，有興趣嘅麻煩揭去新聞版面了解了解。功夫茶想同大家研究一下嘅係，保障私隱無疑係啱嘅，一如顧客永遠是對的，你冇可能將顧客蒙在鼓裏，賣豬仔咁賣吖嘛。之不過咁，保障私隱千祈唔好成為黑箱作業嘅藉口，否則就係剝削公眾知情權。
因乜事幹會有咁嘅憂慮呢？大家不妨睇睇運輸署搞乜鬼。運輸署以保障車主私隱為由，建議收緊法例，只有汽車買賣、追討保險賠償、涉及訴訟等等指定用途先至可以查閱車主資料，違法起底者，最高可罰款五千元以及監禁六個月。
如果大家唔明運輸署嘅建議有乜問題，咁就不如舉一個曾經轟動全港嘅撞車事件說明一下。有一名滿口英文嘅女子，涉嫌醉酒駕駛，撞車之後不但拒絕合作，而且極之倀雞巴辣咁摑咗警員一巴掌，摑到差人叔叔暈佗佗。本來呢，冇人知道襲警女子係何方神聖，記者必須透過運輸署牌照部查閱車主資料。一查之下，哦，原來襲警女子係法官姪女Amina，咁先至明白因乜事幹惡得咁交關。跟住落嚟嘅輕判感化毋須收監係後話嘞，功夫茶要話畀大家聽嘅係，記者查閱車主資料係有必要嘅，否則無法有效監察社會彰顯公義。
呢嗱嗱嗱，假如運輸署以保障車主私隱為由，禁止記者起底，係咪好大問題呀？係咪黑箱作業呀？係咪維護權貴呀？萬一再有另一個法官姪女橫行霸道，大家都無法知道港產富二代係幾咁無法無天啦！
所以話啫，防止八達通公司之類嘅無良企業出賣客戶私隱係啱嘅，一旦借頭借路利用私隱條例瞞天過海就大錯特錯。喂，再舉一個例吖，如果曾蔭權嘅物業資料死瞞爛瞞，記者又點樣揭發佢知法犯法僭建祖屋呀？
總而言之，只要保障私隱，不要黑箱作業！