港大「七一」前的民調顯示，煲呔曾及其班子的民望創八年新低，多達六成一市民反對佢做特首，五成不滿特區政府表現。照咁睇，「七一」後的民望，由於替補機制令政府醜態百出，曾班子本已虛弱的空殼更因失血過多，日後民望肯定趴街！
一眾高官，完全脫離群眾，不知民生為何物。政府有錢，卻大搞面子工程，○九年主辦嘅東亞運涉嚴重超支，亂花公帑，帳委會對負責的民政事務局局長曾德成表示「遺憾」和「驚訝」！德成局長的一筆混帳，難辭胡亂調撥資源之責。東亞運超支逾兩億，為香港提高乜嘢聲譽呀？呢筆錢用來扶貧，政府起碼贏得關愛民生的稱讚。
講開關愛，不能夠不提唐唐貴為主席嘅「關愛基金」，呢個原意在解救Ｎ無家庭嘅基金，早期話資助每名清貧學生三千元參加暑假遊學團，不過要各校董會先開會通過自行墊支，一般學校霎時冇咁多現金，只好將遊學推後至復活節。
其實，有調查發現，不少清貧家庭未能為子女安排暑期活動，如果關愛基金有心做實事，好應該安排得妥善些，資助吓啲基層學童參加暑期活動，既善用時間又充實自己。
可惜，「關愛基金」又係搞「形象工程」，完全不給力；派六千蚊給新移民又玩歧視，要「入息審查」，反而長期離港嘅海外香港市民，嚴格來講真係對香港冇乜貢獻，政府就錢照派。政府處事，完全違反常道，試問又怎能不趴街至最後一分一秒？