政情：鼠王芬丟低「親生仔」
近日「人氣急升」嘅專業會議立法會議員梁美芬（鼠王芬），喺網民連番狙擊下甚少蒲頭，就連佢有份創立嘅智庫組織大舜政策研究中心活動都芳蹤杳然。「大舜」尋日搞咗個傳媒聚會，全程只得身為主席嘅工程界議員何鍾泰唱獨腳戲，大家最關注嘅鼠王芬就依然唔見人，唔知佢幾時先肯出嚟呢？
社交網站facebook上面嘅「我相信有10萬人不想梁美芬再當選議員」群組，開咗短短兩日已經超過二萬人響應，鼠王芬人氣拍得住啲二、三線明星，有網友仲揶揄人數已經超過鼠王芬參選立法會所得嘅一萬九千幾票，呼籲大家繼續參加，誓要繼續谷高人數。睇嚟網民對鼠王芬嘅仇恨程度相當高。
講番尋日個聚會，何鍾泰話，佢哋依家正就替補機制進行研究，遲啲會發表報告，期望可以提供全面角度資料同多角度分析畀市民考慮，唔會好似坊間智庫所做嘅研究咁有導向性。佢又話，「大舜」嚟緊仲有好多計劃，好似「內地孕婦來港產子」及「全民退休保障」都會考慮做研究喎。