政情：唐唐返工總娘家遭柴台
香港工業早已被視為步入夕陽，原本政府肯出手扶持尚有一線生機，可恨呢個夕陽政府闊佬懶理，令工業界怨聲載道。一直維護本港工業嘅香港工業總會尋日換屆，請咗政務司司長唐英年主禮，喺工業界發迹嘅唐唐做過總會主席，返娘家理應好親切至係，但可惜佢能力有限兼準備不足，回應在場工業家訴求時九唔搭八，答咗等於冇答，結果惹來不滿，被恥笑收場。
唐唐尋日致辭時講到，香港工業正處於挑戰同機遇並存嘅時刻，仲特別提到創新科技對香港工業發展嘅重要性，仲話期望創新科技將來可以佔本地生產總值一個重要嘅部分。佢話，相信工業界喺夕陽政府提出嘅「六大優勢產業」之中都可以佔到一個重要嘅部分，希望業界以前瞻性嘅態度同新思維去迎接挑戰。講就講得好聽，但相當高大空，而且遠水不能救近火。
「講咗等如冇講」
到答問環節時段，戲肉嚟嘞，台下發言嘅工業界老闆們都好擔心依家嘅營商環境，希望政府做番少少實事幫佢哋渡過難關。好似本身係特首選舉委員會委員嘅單志明咁，經營皮草生意幾十年，佢話廠商面對高成本、低利潤，希望唐唐提供切實可行方案解決廠商嘅困難。呢個問題直接又實際，唐唐理應識得答吖，好可惜佢竟然「九唔搭八」。
唐唐人肉錄音機上身，炒番上月底一個活動時致辭嘅內容，話透過「政府行為」可以幫到業界，就好似取消紅酒稅咁，呢個政策令到紅酒業即時喺香港蓬勃起來喎。嘩，真係答非所問，單志明第一時間話：「講咗等如冇講！」同枱另一位業界就揶揄話：「即係話政府已經做咗好多，但只係幫紅酒做囉！」
單志明事後話，唐唐嘅答案認真高深，可能自己做廠幾十年，頭腦唔夠靈活，相信要消化吓先聽得明。佢仲話，業界依家做得好辛苦，真係希望政府幫到佢哋，仲笑稱聽完唐唐回應，轉做紅酒就發達啦，但佢就唔識做喇。如果唐唐聽到業界咁講，相信會無地自容。
另外，新任工總主席鍾志平尋日提到，希望政府制訂長遠工業政策、提升產品檔次、建立品牌，幫香港產品打開新市場。工業總會遲啲會將建議交畀政府，但觀乎唐唐尋日嘅表現，唔知新主席對政府仲有冇信心呢？