中環出更：陳健波籲考生申訴代替爆粗
城市人爆粗發洩經常有，但近日就有考生因為爆粗搞到成績被降級。卓妮前日路過中環見到立法會保險界議員陳健波，佢話如果考生有任何不滿可以去申訴，但就唔應該講粗口喎。為人父親嘅健波話，有感依家好多年輕人分唔開網上世界同現實世界，佢哋喺網上講乜都可以，但現實世界就唔係咁好喇，行為應該要檢點。
金刀梁：講都唔好畀人聽到
健波憶述，細個時媽咪對佢好嚴厲，有乜唔啱就會打到飛起，記得試過打到佢成手藤條印，搞到佢返學畀同學笑，好影響佢嘅幼小心靈。不過，健波坦言試過對自己囝囝施予體罰，但到囝囝大個之後，就會用溝通同鼓勵嘅方式讓囝囝明辨是非，結果好有效用，依家囝囝仲去咗美國讀經濟添，所以溝通總好過成日打打罵罵。
至於港大校董會主席梁智鴻（金刀梁），都好認同考生如有不滿可以去投訴，但喺公眾地方講粗口洩憤就唔係咁好，就算講都唔好畀人聽到。金刀梁細個都係行體罰制，每逢遲交功課都被學校神父打到飛起，但佢話依家社會唔同晒，唔可以隨便體罰，社會同家長都應該喺德育方面加以關注。