中環出更：肥亨潘宗光教做快樂員工
中策集團主席馬時亨及前理工大學校長潘宗光，最近經常為「香港提升快樂指數基金」孖住周圍去講Talk，分享做個開心秘訣。日前佢哋又現身中環ifc，分享做個快樂打工仔嘅心得，肥亨自爆當年拚命工作博得上司賞識嘅艱辛歲月，又話為官勿抱打工心態；潘宗光就勸誡大家莫計較眼前得失，寓意深遠。
出身投資銀行嘅肥亨話，七十年代佢喺紐約打工，當時上司唔係好鍾意佢，為咗證明自己嘅能力，佢一個星期做足七日，努力爭取表現，一年半後終於升職，所以佢勉勵後生仔唔好怕辛苦，要盡力做到最好。潘宗光就自揭當年喺香港大學任教時，曾因升唔到化學系主任而患得患失，但半年後卻高票當選更高級嘅理學院主任。所以眼前得失咪太在意，做個快樂員工最實際。
談為官之道寸煲呔曾？
喺肥亨眼中，壓力最大嘅工作莫過於問責官員。做過商務及經濟發展局局長嘅肥亨話，做官壓力大未必唔好，只要諗住係為人民服務，壓力就會變動力。佢仲話，當年由商界轉入政界，係勁減人工去做，所以佢勸喻有心做官嘅人，要有使命感至好去做，千祈咪抱住打份工嘅心態。語畢，佢笑住話，呢句話唔係衝住特首講㗎！
當年煲呔曾競選金句係「我要做好呢份工」，心態茍且敷衍，深入民心，至今仲做緊笑柄，遇啱咁嘅特首，實在係香港嘅不幸。
卓妮