政情：莊偉茵談人生低潮
咪睇國泰航空企業事務董事莊偉茵（Quince）經常笑口常開，工作又有趣，但原來佢都曾經面對人生極大考驗，話說十幾年前佢嘅囝囝出世時，就試過靠朋友接濟奶粉足足一年。所以話，人生難免有挫折，但最緊要逆境自強。
冇錢買奶粉
Quince尋日應青年事務委員會主席陳振彬邀請，到一間學校同學生哥分享《飛一般的路》，佢話自細發展並非一帆風順，小學曾因為英文同數學唔合格而留班，後來發憤苦讀英文，中學畢業時更代表學生以英語讀致謝詞。
十九年前，Quince遇到人生更大嘅低潮，當年任職金融業嘅老公投資失利，成頭家就靠喺酒店任職嘅Quince頂住，咁啱囝囝啱啱出世，好彩獲得一位任職護士嘅舊同學幫佢張羅奶粉，仲供應咗一年添，加上親友支援，先至渡過難關。直至九八年入職國泰，發展就順利好多喇！
Quince話，遇上壓力不外乎做運動、夾Band，唔諗工作就已經減咗壓。經歷咗人生咁多波折，佢有句座右銘同大家分享：「每一日，都是人生的新一日。」