政情：發叔小強翻兜區會？
政府上年通過政改方案時，講到明會取消區議會委任制，但冇講時間表，到依家都未有聲氣，近日就有消息傳出，已經失去區議會當然議員資格嘅鄉議局主席劉皇發同副主席林偉強，都極有機會再獲委任做區議員，如果屬實的話，認真係民主大倒退。
傳再獲政府委任
劉皇發同林偉強原本都分別以鄉委會主席身份進身區議會，並且成為區議會主席，好可惜，兩位年初雙雙喺鄉委會選舉失利，失去當然議員及區議會主席資格，黯然離開區議會。地區人士一直都傳緊，政府會再安排兩份免費政治午餐畀劉皇發同林偉強，等佢哋重返區議會，繼續為政府遮風擋雨。
如果事態真係咁發展，呢個夕陽政府認真不知所謂到不能形容。政府自己一早講過，唔會再委任番啲落選咗嘅民選議員，雖然劉皇發同林偉強都唔係民選議員，但原則無分別。咁樣委任，唔只係免費政治午餐呀，仲係政府殘廢餐添呀，以劉皇發咁有頭有面，斷估應該唔會肯接受政府委任啩？