政情:工聯謀滅「鼠」重奪九西

政府喺七一遊行後押後二讀立法會替補機制,呢個跪低決定除咗令煲呔曾夕陽政府僅餘嘅威信斷送外,亦令到一名建制派議員「聲名大噪」,一夜之間熱爆網上各大討論區,呢位議員就係力撐替補機制嘅「鼠王芬」梁美芬喇!鼠王芬當年獲得工聯會配票成功進身立法會,如今連番遭受網民狙擊兼唱衰,人氣一鋪清袋,據聞工聯會重新考慮喺下屆選舉派人出戰九龍西,鼠王芬連任勢必危危乎。

廿二萬人喺七一上街後,一直力撐替補機制嘅鼠王芬就對外宣稱未有投票意向,點知到政府跪低宣布押後機制二讀當日,佢即晚廣發宣傳單張,反對政府唔做諮詢喎。單張隨即喺網上熱傳,網民對鼠王芬大加撻伐,批評佢乘機抽水,有網民仲好有創意將鼠王芬頭像貼喺一隻真老鼠上面,寓意佢係「過街老鼠、人人喊打」。有網民仲呼籲大家提供鼠王芬嘅玉照畀大家改圖,睇嚟今次肯定有排玩。

鼠王芬身處政圈,理應明白政壇係個一沉百踩嘅地方,據了解,○八年曾經全力協助鼠王芬競選立法會、將旗下鐵票過畀佢嘅工聯會,內部近日有聲音希望派人重奪九龍西一個議席,據聞工聯會領導層都心郁郁,依家只係等緊中央首肯就水到渠成。

忘恩負義種禍根

工聯會內部消息話,鼠王芬自從上次選舉後多謝都冇句,而且仲夠膽話冇受過工聯會恩惠,令工聯會由上至領導層、下至會員及義工都好唔滿意,難得今次鼠王芬人氣暴跌,仲唔乘機光復九龍西咩?況且工聯會會長鄭耀棠今年初講過,要由副會長陳婉嫻帶領五個選區出戰,換句話唔再幫鼠王芬抬轎,但呢個講法鬧大咗之後,事後就不了了之,但如今形勢逆轉,就可以攞正牌重提舊事嘞。

講番今次主角鼠王芬,尋日都有出席立法會會議,但就一直冇見記者,記者曾經透過好多議員叫佢出嚟傾幾句,可惜佢唔肯出嚟。同屬專業會議嘅工程界何鍾泰及建築界劉秀成,就不斷幫鼠王芬講好說話,何鍾泰仲叫大家唔好「蝦」梁博士添,認真得意。不過,逃避都唔係辦法,奉勸鼠王芬都係快啲出嚟面對現實好過啦!

Money18免費即秒股票報價網站現推出8升級功能,財經資訊,實時實發!