中環出更：愛妻赴英開會 彭曉明拒隨行
做公職總要有所取捨，好似香港女童軍總監彭徐美雲，由於會務好忙碌，所以陪老公彭曉明嘅時間都少咗，之前七一假期嘅賽馬日，平時同老公秤不離砣嘅佢，都因為有幾個活動出席，要老公一個人孤伶伶入場，但彭生一啲都唔介意，事關馬場撞口撞面都係佢啲老友喎！
彭太嚟緊仲要再同老公「請假」，去英國愛丁堡開會七日，由於時值暑假，為免老公會悶親，所以彭太力邀老公同行，過去打番場高爾夫球，但被彭生拒絕咗。彭生解釋，今次太太要開足七日會，如果佢隨行的話，太太一定會堅持為佢安排節目，兼且會心掛掛照顧得個老公唔好，為免太太分心，所以堅拒隨行。
結婚30周年諗禮物
其實彭生呢個暑假都好唔得閒，因為要準備十月結婚三十周年紀念，諗緊送份神秘禮物，希望到時可以冧暈太太喎。咁又係，太太咁愛自己，彭生點可以無表示吖！
卓妮