中環出更：菁英會包場睇戲聯誼
炎炎夏日最佳消暑節目就係睇戲，菁英會副主席楊華勇（Johnny）同莊家彬（Albert）為聯絡兄弟感情，就喺啱啱過咗嘅星期日出錢包場請睇戲。查實Johnny嘅清水灣過萬呎嘅楊家大宅內，設有私人影院，但佢話喜歡熱鬧：「同班兄弟排排坐睇大銀幕，開心過一支公。」
周日晚九點幾鐘，卓妮行經金鐘太古廣場AMC戲院，遇到七十位菁英會兄弟姊妹，浩浩蕩蕩入場，原來呢晚係「菁英」專場。難得一齊睇戲，創會主席施榮忻同太太Jaymee，榮譽主席白富鴻、新任主席洪為民、會員彭芷君一家，以及新入會嘅湖北首富梁亮勝女婿蔡穎恆，都去霸番個靚位睇好戲。
彭沖為愛女做「夜貓」
Albert同Johnny好細心，為入場兄弟預備爆穀同可樂，果然諗得周到。當晚彭芷君仲帶埋爸爸港協暨奧委會秘書長彭沖同媽媽去湊熱鬧。彭沖坦言，習慣早睡早起，平日每到十點就上床瞓覺，但為咗撐囡囡，做一晚「夜貓」咁多啦！
卓妮