中環出更：媽打變Wonder Girls 為港大籌款
做人最緊要飲水思源，好似前民政事務局常秘「媽打」李麗娟，之所以相識滿天下，全因為佢重情又重義，前幾日佢聯同其他同屆畢業嘅港大天子門生，一齊為母校籌款，順便慶祝大家畢業四十年，一齊開開心心玩番一晚。
媽打李麗娟性格開朗吃得開，自從退休之後，做咗籌款專家，好似今次返母校搞畢業四十周年派對，就成功為新建嘅百周年校園籌得四百萬元善款，用作添置公共藝術品，仲有望再發水到六百萬元添！咦……乜唔係一直講開籌二百萬嘅咩？媽打搵咗十個贊助單位，每個單位捐廿萬，點計都係二百萬喎，何來有四百萬呢？
媽打本事嘅地方就喺呢度喇，轉數快嘅佢，收到二百萬元後，就馬上諗到可以同學校配對二百萬元，仲即時坐言起行搵港大校董會主席梁智鴻（金刀梁）商量。
金刀梁夫婦本身都係港大校友，而梁太馮令儀又係同媽打同屆畢業，又點會Say no呢？搞掂咗四百萬元，熟悉籌款嘅媽打有信心再搵多百分之五十嘅資源再作配對，換言之邁向六百萬元冇難度。
張永霖唱歌 黑英棟篤笑
講番個晚會，媽打同幾個同學籌備咗半年，仲組成Wonder Girls，有晒造型咁又跳又唱，雖然台上只係表演幾分鐘，但係過去兩個月就要齊集練舞，咁勤力，難怪睇到大家都拍爛手掌啦！
媽打話，為咗今次嘅晚會，大家都落力獻技，好似前亞視執行主席張永霖都上台唱英文歌，張太同其他人都聽到如癡如醉。至於口才了得嘅前天文台台長「黑英」林超英就緊接表演最拿手嘅棟篤笑啦，大家都忍唔住大讚佢呢位冷面笑匠一上台就名嘴上身。
講開又講，媽打十五年前搞咗一次畢業廿五年晚會，結果成為傳統，凡畢業滿廿五年嘅校友，每年都會搞一次籌款晚宴，所以今次搞四十年晚宴，佢都希望可以再次成為傳統，等大家有得相聚之餘，又可以為母校出力，一舉兩得。
卓妮