炒樓炒股大家聽得多，有冇聽過炒時段？如果冇聽過，咁就要見識一下腦筋靈活香港人嘅刁鑽經濟學嘞。
就咁，康文署轄下有好多體育設施，網球場呀，籃球場呀，足球場呀，諸如此類。如果你想去打波，你當然要預先訂場啦。之不過咁，黃金時段好大機會客滿見遺，你訂來訂去都訂唔到，咁點算好呢？你可以嘗試上網搵一搵，話唔定會搵到適合自己嘅場館使用時段。
假設係非常搶手嘅星期日下午三點，你去康文署預訂通常係白費心機，你必須上網聯絡炒家。冇錯，係炒家，佢哋手頭上有大量康文署體育設施嘅使用時段。你想星期日下午三點約埋三五知己去打波咩，畀錢囉，速速磅，唔好兩頭望。
呢嗱嗱嗱，呢家嘢就係叫做炒時段，情況就好似炒黃牛，有人一早買晒所有門券，然後吊高嚟賣，善價而沽。所以話啫，蠱惑香港人真係非常之咁刁鑽，唔會放過任何生財之道，絕對係徹頭徹尾嘅機會主義者。
大家可能會問，康文署有冇蠢得咁交關呀？有乜可能唔諗辦法杜絕網上炒賣活動呀？問得好，事關申訴專員公署都好想知道答案。所以咯喎，申訴專員黎年決定主動調查，黎專員係咁講嘅，公署過去兩年先後處理超過五十宗有關康文署體育設施嘅投訴，涉及場地預訂以及使用問題，公眾關注體育設施預訂時段嘅炒賣，當中網上炒賣猖獗，但當局打擊措施未見成效。黎年又話，康文署體育設施、活動與相關事務嘅整體公帑資助率高達八成，最重要係確保市民有使用設施嘅公平機會，並且盡可能杜絕濫用同浪費公帑。
申訴專員公署主動調查會有乜嘢結果呢？功夫茶唔係生神仙，當然無法預知，不過以往績推算，十居其九係官僚作風累事，署方職員一個二個奉行不做不錯主義，話之你炒時段炒到鑊氣沖天。
申訴專員公署主動調查無疑係好事，之但係有一樣嘢值得關注，你知啦，有時候本地刁民好鬼惡死o架，你去打擊網上炒賣活動有可能遇到無理取鬧。就好似最近席捲全城嘅僭建風暴咁吖，黎年發表報告狠批政府各大部門取締僭建村屋失職，哈，新界鄉紳居然認為黎專員玩針對，揚言發起「流血革命」爭取僭建合法化。萬一，網上黃牛黨又話要爭取炒時段合法化，點算？
計功夫茶話齋，對付惡霸最好嘅辦法係惡過佢，對付懶蟲最好嘅辦法係炒咗佢。如果申訴專員調查發現康文署有人失職，放任場館時段炒賣，唔使講咁多，一於炒魷魚！