政情：民記煲呔曾互篤死穴
民建聯南區支部近日開班教市民自製「橡皮圖章」，結果被網民寸爆佢哋做「橡皮圖章」認第二，冇人敢認第一，仲有網民話要參加做番個「民建聯最無恥」嘅圖章，認真爆。不過，民記呢個「橡皮圖章」向來有辱無榮，經常被煲呔曾夕陽政府跣到應一應，適逢尋日民記十九周年會慶酒會，民記主席譚耀宗（譚Sir）就借機寸爆到場主禮嘅煲呔曾。
譚Sir致辭時話，尋日係煲呔曾第六次以特首身份出席佢哋會慶酒會，好有可能係最後一次，除非民記將明年嘅酒會日期提前喎。呢番說話即時惹來在場嘉賓一陣騷動，煲呔曾亦都一路聽一路臉黑黑兼Ｏ晒嘴，話佢唔係畀人講中死穴都無人信喇！
煲呔曾出名小器，呢啖氣邊會咁易啃得落吖，於是又喺致辭時反擊，將民記同政府嘅關係「降呢」，由原先嘅「親密戰友」降低為「重要夥伴」，結果互寸完一輪後完場。