政情：吳康民寸政府唔果斷
前港區人大代表吳康民有預知能力？尋日電台播咗康叔一星期前錄製嘅節目，句句寸爆煲呔曾夕陽政府。康叔話︰「依家政府最大嘅毛病就係優柔寡斷，啲嘢一嘈就改，改咗又唔一定好。」點知前日政府就「跪低」，將立法會替補機制押後表決。雖然康叔今次係講緊政府將注資強積金改為派錢，但佢卻一矢中的射中高官嘅要害，呢番名言引用喺任何政策都咁啱使。
康叔年紀有番咁上下，為咗保持頭腦靈活，佢堅持日日都睇書讀報，所以經常有好多諗頭。佢話，頭腦衰亡係人死亡嘅開始，人哋話哀莫大於心死，佢就覺得「哀莫大於腦死」喎。夕陽政府一向畀人話係「腦殘」政府，康叔今次真係寸到應一應。
曾自言寫嘢易過食生菜嘅康叔，原來自細就訓練有素，就算喺學校做嘢嗰陣都堅持自己寫公文，出席演講時講稿一定唔會假手於人，佢話︰「人哋寫都唔知講乜，讀起嚟唔順。」前日政務司司長唐英年出嚟宣布將替補機制表決押後時，照稿讀都讀到甩甩咳咳，睇嚟都係要跟康叔學吓嘢喇！