政情：沈祖堯賀品酒生揚威
自從本港葡萄酒免稅後，多咗市民品嘗葡萄酒外，中文大學去年亦成立咗個品酒學會。學會三位學生早前就遠赴法國波爾多參加「葡萄20」品嘗競賽 （20 sur vin），力壓有超過二百年歷史嘅劍橋大學品酒學會及其他歐美大學生，奪得亞軍，僅以一分之微敗給哈佛大學商學院研究生。尋日佢哋搞咗個祝捷酒會，中大校長沈祖堯親身到場打氣。
沈祖堯同三位得獎學生巢景峰、劉敏珊及丘家兆摸住酒杯底交談，佢讚揚得獎同學表現出色，雖然佢哋酒齡尚淺，但卻能在短短嘅備戰時間內熟讀品酒專業知識，並參加唔同嘅試酒會以增加品酒經驗，實在值得嘉許。
今次品酒比賽中，三人獲頒兩支99年Lafite Rothschild佳釀獎品，但尋日佢哋就冇開到呢兩支酒，只係開咗支普通嘢請校長飲，唔知佢哋會點處理呢兩支佳釀呢？