政情：爭床生子Call爆高官
夕陽政府處理人口同醫療政策交白卷，令大批內地孕婦湧港分娩，本港公私營醫院不勝負荷。不過食物及衞生局局長周一鑊只係頭痛醫頭，一刀切削減內地孕婦來港分娩配額，但就影響埋啲港人內地妻子來港生仔嘅機會。中港家庭權益會繼早前多次狙擊周一鑊同參加七一遊行大控訴後，尋日又發起「一人一電話，Call爆高官」大行動，爭取醫院分娩床位。
中港家庭權益會尋日向各界發出「SOS救救100小生命」為主題嘅新聞稿，呼籲大家一人打一個電話，Call爆六位港府同醫管局高層，包括政策最高拍板人煲呔曾、人口政策負責人政務司司長唐英年、頭痛醫頭嘅周一鑊及副手梁卓偉、仲有醫管局主席胡定旭及行政總裁梁栢賢。權益會希望喚起六人嘅良心，阻止佢哋做阻撓孕婦來港生仔嘅「兇手」。
權益會仲教埋大家喺電話中點樣對答，包括強調港人嘅內地妻子都係香港家庭一分子，有權喺公立醫院分娩，唔應該突然「落閘」；又指正懷孕嘅港人內地妻子，已持有九十天探親雙程證，屬於持續留港生活，唔係周一鑊所講嘅「長途跋涉」來港分娩。權益會仲話，如果大家打去冇人接聽，就留低姓名同電話，要求對方回覆，最後當然係呼籲更多親友參與行動啦！
面對中港家庭孕婦連番狙擊，冇被列入Call爆名單嘅衞生署署長林秉恩，尋日就話現正同私家醫院商討，能否安排港人內地妻子優先使用內地孕婦嘅床位配額。其後梁栢賢仲透露，會搵約三千個私院床位。不過，權益會就批評有關建議「本末倒置」，指目前約六成中港家庭孕婦根本負擔唔到私院嘅高昂分娩費用，最終都係要靠公立醫院產科服務，所以有關建議根本毫無幫助，未能對目前僵局帶來任何契機。
梁卓偉風頭火勢搞音樂
雖然未知權益會今次行動成效如何，但食衞局副局長梁卓偉就一於話之你，尋日竟然仲有心情喺特首辦官方facebook同鋼琴神童沈靖韜暢談音樂人生，甚至拍埋段片同神童韜合奏《牙買加倫巴舞曲》，結果當然畀網民鬧爆。有網民批評：「港府，我真係服咗你，依家風頭火勢，民怨如火山爆發，你仲有閒情搞音樂？」莫非梁卓偉想學當年回歸夜警方播放貝多芬音樂咁，用鋼琴聲掩蓋中港孕婦嘅不滿怒吼？