中環出更：施氏兄弟歎私房菜憶辛酸史
中華廠商聯合會副會長施榮懷（Irons）同弟弟百仁基金主席施榮忻（Jaime），熱心投身社會事務，加上家族生意公私兩忙，連食飯都要趕幾場。
經營酒樓 執笠收場
早前一個午膳時間，難得兩兄弟忙裏偷閒，相約喺中環士丹利街金禾大廈五樓嘅東南飯店歎私房菜。美食當前，加上老闆娘Judy親切招呼，令佢哋不期然諗起當年經營酒樓嘅酸甜苦辣。
唔講唔知，原來施家兄弟曾經喺九八年至○三年期間，喺灣仔三湘大廈經營德榮酒家。Irons形容，呢五年時間係香港最艱難嘅時期，事關九七年亞洲金融風暴令樓股泡沫爆破，兩年後到科網股爆煲，過多三年又爆發致命嘅沙士疫症，認真屋漏兼逢連夜雨。不過，搞笑嘅係酒樓執笠原因，竟然係業主逆市瘋狂加租，目的係逼走租客以便賣盤套現，佢哋把心一橫執笠算數。
Irons同Jaime都話，經營酒樓要令到食客同捧場嘅朋友稱心滿意，一啲都唔容易，所以佢哋對Judy經營餐廳嘅一腔熱忱讚不絕口。更加抵讚嘅係堅持唔落味精、絕對唔用冰鮮肉嘅成枱美食。
Judy係江蘇人，老公譚生係順德人，所以佢哋嘅菜式以粵式為主，亦有令人驚喜嘅江浙菜。當日地道順德菜「家鄉煎焗雞」及「陳皮清蒸斑頭腩」，食到施家兄弟舔舔脷。飯後甜湯「酒釀丸子」更加抵讚，即叫即搓嘅湯丸彈牙煙韌，加上淡淡酒香，令人回味無窮。難怪Jaime詳細打聽餐廳可容納幾多人，梗係密謀搵佢班城中富豪二代兄弟嚟幫襯喇！
卓妮