近幾個月奪命猩紅熱肆虐，累積個案差唔多七百宗，仲有兩個小朋友死咗。食衞局局長周一嶽到依家只係不斷講猩紅熱高峰期會持續，但政府有咩辦法控制疫情就無咩點講，尋日佢同衞生防護中心總監曾浩輝特登落去中環一間幼稚園了解學校防疫措施，周一鑊頭岳岳睇咗一陣，都唔知對防疫工作有咩幫助。猩紅熱殺咗兩個小朋友先嚟懶關心，局長會唔會愛得太遲呢？
奪命病菌與病毒年年襲港，腸病毒、流感搞到香港小朋友同家長驚餐死，如果無記錯，周一鑊咁多次疫情都無咩點去幼稚園或者小學「探班」，佢尋日破天荒訪問聖公會幼稚園（中環校），了解該校因應猩紅熱所做嘅預防措施，大半個鐘訪問裏面，佢睇吓班小朋友喺操場玩遊戲，然後走入課室打個圈，跟住同傳媒匯報猩紅熱概況。周一鑊呢個官式拜會象徵意義勝於一切，你不如好好同班下屬諗下遲啲暑假猩紅熱繼續爆，政府有咩具體嘢做好過啦！