政情：羅智成愛上Hea遊島嶼
台灣駐港機構光華新聞文化中心就快會改名叫做台北經濟文化辦事處，不過唔理改唔改名，主任羅智成都計劃帶一家大細出遊，佢話以前旅行鍾情浪漫嘅歐洲，近年就愛上島嶼嘅散漫。
羅智成同太太早前出席一個活動，佢話調任香港一年幾，開始明白點解香港人咁鍾意食嘢同埋旅行，原來係減壓嘅最佳良方。佢自稱係個玩家，經常周圍走，好似復活節啱啱去咗峇里島，玩得好開心盡興。
佢話，以前鍾意到歐洲旅行，因為欣賞歐洲嘅浪漫氛圍。近年佢就愛上去島嶼度假，貪佢夠晒無拘散漫，而且每隔一段時間就有新嘅酒店落成，永遠畀遊客有驚喜。
有三位年幼仔女嘅羅智成，出外旅行有個特色，佢為咗唔令自己度假嘅樂趣因為要陪小朋友而大打折扣，鍾意約埋親朋好友成班人一齊去，有時多達三、四個家族，咁樣玩法，老老少少嘅快樂指數都倍增，真係高招。