政情：夕陽政府衰到冇朋友
今年七一遊行氣氛熾熱，竟然錄得繼○三年五十萬人遊行後另一上街人數紀錄，事後好多分析都估計，今次之所以吸引到咁多市民上街，全因政府無厘頭喺七一前炒熱「替補機制」呢個議題，市民覺得自己選舉權無故被剝奪，義憤填膺下紛紛走上街頭。政府尋日終於褪軚，押後恢復二讀方案，夕陽政府跪低固然樣衰，不過成件事最好笑係睇到一眾建制派又再一次畀煲呔曾玩多次，相信過埋今次之後夕陽政府餘下任期之內都好難再搵到真正朋友喇。
替補機制其實炒咗接近兩個月，政制及內地事務局局長林瑞麟堅持唔做公眾諮詢，目的就係想快刀斬亂麻，而以民建聯同工聯會為首嘅建制派就一早舉手支持，話要杜絕「五區公投」再次出現咁話；其他建制派議員雖然冇公開講到明支持，不過人同此心，都係想睇吓七一有幾多人上街先至決定。
可惜人算不如天算，七一遊行人數出乎建制派議員所料，結果近幾日各建制派議員立場開始動搖，其中旅遊界謝偉俊第一個走出嚟，講到明唔做公眾諮詢就冇得傾，之後到新民黨主席葉劉淑儀，星期日突然約咗幾位獨立功能界別議員出嚟傾下一步點走，結果傾完出嚟亦係對外宣稱要做諮詢，仲建議政府押後咁話。自由黨具體提出修訂建議，列明若果立法會議席係真正出缺而非因議員玩嘢，需進行補選。
至於五散人之中，除咗廠商會林大輝之外，其餘四位都不斷諮詢業界，就連一向話要杜絕「五區公投」，曾率先提出私人條例草案唔畀辭職議員重新補選嘅專業會議法律博士梁美芬，由於佢係透過直選進身議會嘅，有見七一上街人數眾多，即時立場軟化，話未有決定喎。
經濟動力四位議員一向最親政府，不過發起人之一林健鋒，尋日喺政府跪低前竟開口質問林瑞麟點解唔做諮詢。都係自由黨立法會議員方剛講得好，政府嘅做法簡直係累死成班建制派。
民記工聯勢危
建制派走吓一個、走吓又一個，結果得番根正苗紅嘅民建聯同工聯會苦苦支撐，依家政府主動押後，對呢兩個政團嚟講未嘗唔係好事，只係唔知立法會十月復會後，政府會唔會繼續恢復二讀，如果係嘅話，民建聯同工聯會區議會選舉選情隨時大受影響。講到底，幫煲呔曾政府實在係有辱無榮嘅工作，建制派不如為吓自己着想，放棄夕陽政府，好過搞到自己樣衰衰吖！