中環出更：福臨門太子爺棄醫從廚
醫生高薪厚職，社會地位崇高，但對於病理學醫生徐德耀（Daniel）嚟講，寧願「棄醫從廚」，放下醫生袍，換上圍裙，接掌富豪飯堂福臨門家族生意。Daniel本着醫者父母心，日前捐出價值逾四萬元福臨門酒席撐防癌會，愛心爆棚。
拿手蒸魚蒸肉餅
Daniel係孝順仔，四年前由英國返港，協助人稱「七哥」嘅爸爸徐維均打理福臨門，並擔任執董一職。太子爺絕無架子，酒樓事無大小，佢都一腳踢。
Daniel自嘲廚藝麻麻，拿手好戲係「蒸嘢」，包括蒸肉餅同蒸魚。但佢非常好學，努力學習餐飲管理嘅知識，仲狂刨全港食經，連雜誌食評家專欄都唔會放過。
以外行人身份管理福臨門，Daniel承認挑戰大，幸而從小受爸爸耳濡目染，對美食佳餚甚有研究。數至愛菜式，係福臨門一味鮮蓮子冬瓜盅。Daniel話，秘訣係燉煮冬瓜時落足火候，讓金華火腿及嫩雞精華完全滲透入冬瓜內，難怪成為招牌菜。