古代杞國有個人成日擔心天會冧落嚟，畀人笑到面黃，仲因此產生咗個成語叫做「杞人憂天」。不過咁，如果呢位古人生活喺今時今日嘅香港，唔只唔會畀人笑，仲可能有好多人向佢學習添。唔信？呢，連續兩日發生冧石屎事故，證明香港隨時禍從天降，想保住條命，「杞人憂天」係好重要㗎。
尋日，北角錦屏街上面有塊三吋乘三吋嘅石屎跌落街，好彩冇人受傷。而俗稱「鵝頸橋」嘅堅拿道天橋，前日就有一塊十吋乘四吋嘅石屎從天而降，場面更加驚險。大家都知喇，鵝頸橋下面係巴士站，亦係打小人攤檔嘅集中地，成日人來人往，車水馬龍，咁大塊石屎跌落嚟，分分鐘搞出人命㗎。所以呢，今次冇人中招，可以講係奇迹咯。
冇人中招係奇迹，但點奇都奇唔過當局事後嘅處理方式。路政署收到報告後，派人到鵝頸橋係咁意望吓，拆咗部分石屎，就話冇即時危險，叫警方解封現場，然後收工走人。其實，現場所見，拆咗石屎嘅部分有六呎乘一呎半咁大，露出生銹鋼筋，係人都睇得出係日久失修啦，依家冇即時危險啫，唔代表冇事㗎，當局冇進行任何維修，橋底下面繼續人來人往，係咪真係要等到死人先至做嘢呀？
講開天橋，令人諗起東區走廊嘅安全問題。月前東區走廊出現橋躉移位、支座變形、橋面裂開，路政署瞞得過就瞞，直至本報踢爆，先至死死氣認衰。東區走廊係香港嘅交通大動脈，車來車往，萬一出事，荷里活嘅災難片隨時喺香港上演現實版，真係諗起都驚。
其實，天降石屎、橋躉移位呢啲問題，只不過係冰山一角咋，香港處處都係都市炸彈，死亡陷阱，令人步步驚心，防不勝防。遠嘅唔講，近年冧樹、冧樓、冧招牌、冧簷篷，幾乎無日無之；仲有吖，僭建物遍地開花，劏房危機處處，是但發生一單意外，都足以收買人命。唔怪得有人話，香港變危城，除咗禮賓府及政府辦公大樓，幾乎冇一處地方係安全嘅。
香港本來係福地，點解會淪落到變成險地呢？講到尾，都係特衰政府嘅官僚累事。佢哋認為冇即時危險就關人個關，更離譜嘅係，由特首到高官，竟然知法犯法，你僭建，佢亦僭建。所以話，旨意特衰政府保障市民安全，真係發夢都冇咁早。
求人不如求己，前日鵝頸橋冧石屎有驚冇險，可能係因為嗰度有打小人攤檔，市民求得神多自有神庇佑啩。計功夫茶話齋，到鵝頸橋打小人、驅瘟神、自求多福，總好過等特衰政府打救喇。嚟嚟嚟，打你個小人頭，打到你做唔成特首；打你個小人腳，等你有鞋唔識着！