「燕之家」老闆白富鴻卸任「菁英會」主席後，現正積極考慮參選年底區議會選舉，佢尋日就上電台節目小試牛刀，同班政壇新秀就時事話題比決，磨利把嘴。不過，班新秀句句有骨，暗寸佢係商家佬，不知民間疾苦。白富鴻坦言自己年輕時都捱過窮，當年返佛山家鄉接濟親友，更要着五條褲、八件衫，避過海關打稅。
白富鴻開咪自爆身世，佢話當年由加拿大讀書返港後，打過五、六份工，做過地產代理，渴望發達卻遇上九七金融風暴，後來才輾轉創立燕窩品牌。不過，佢坦言○三年遇上沙士，一度愁眉苦臉，殊不知忽然吹起保健風，商舖業主又紛紛減租谷起市況，生意額不跌反升。呢個故事話比大家知，時世造英雄，有危自有機，想發達就要執生嘞！
班政壇新秀繼續追問白富鴻點睇地產霸權，佢話贊成復建居屋，幫助年輕人上車，但就唔認同後生仔要買樓置業先有前途。佢話，九七樓市風暴一役，至今仍記憶猶新，好多業主騰騰震，所以租樓住一樣咁happy喎。