政情：甘威被嘲英語未夠班
立法會議員陳克勤當選之後一句「Try my breast」成為香港笑話，但原來低處未算低，仲有議員嘅英文差過佢。五月底波蘭國會議員訪港，立法會就派出幾位議員招呼呢班貴賓。雙方開會時，克勤仔就口窒窒用英語力撐未修訂前嘅「防公投」替補機制，點知就畀班波蘭國會議員反駁話民主係無價嘅，但總結當日克勤仔講嘅英語唔算差。
不過，有與會中人爆料，話白鴿黨議員甘乃威講英語講得仲差過克勤仔，又話佢從來都唔敢公開講英文，好彩立法會冇叫佢去招呼班波蘭國會議員，如果畀人哋聽到佢啲英文，分分鐘有損香港嘅國際形象喎。
呢位爆料人又話，甘乃威身為港島區立法會議員，英語水平確實同班中產選民質素有啲落差。其實甘乃威嘅英語水平即使差過克勤仔，但惡補吓咪OK囉！