政情：鄉紳疑似中山裝夠醒目
發展局鐵腕處理新界村屋僭建問題，搞到鄉議局上周二動員三千人冒雨包圍立法會抗爭，咪睇現場啲鄉紳一身「鄉土味」，但其實可以執到好正，着起龍袍似太子。話說喺包圍立法會翌日，班鄉紳打晒呔着住件疑似中山裝，隆而重之咁出席鄉議局新大樓開幕禮。
出自劉玉蓮手筆
據悉，呢件咁整齊醒目嘅裝束係出自鄉議局成員余漢坤太太、設計師劉玉蓮（Virginia）嘅手筆。
據講呢套疑似中山裝係用意大利質料製造，價值幾千元，由於用料上乘，有百幾名鄉坤響應訂購，唔少出席開幕典禮嘅嘉賓見到套衫都讚不絕口。
今次Virginia設計嘅服飾咁得班鄉紳歡心，又得到咁多人開腔讚賞，唔知佢第時會唔會再下一城，為鄉議局設計更多別出心裁嘅服裝宏揚新界傳統文化呢？甚至日後成為局方嘅御用服裝設計師？