政情：打擊洗錢 殃及政圈人物
通脹猛於虎，市民嘅人工愈來愈唔見使，惟有諗計為資產增值，其中開設人民幣戶口投資係個唔錯嘅選擇，但原來唔係每個市民話開就開。最近有政界人士或其家屬去非中資銀行開戶時，就好似被人當做洗黑錢或恐怖分子咁拒絕，但轉個頭去中資銀行開戶時就即時獲批。究竟係非中資銀行過分緊張吖，定係中資銀行太過「無掩雞籠」呢？
有負責制訂打擊洗黑錢國際標準嘅組織，曾係○七至○八年對香港打擊洗黑錢嘅工作進行評核，事後該組織提及目前制度嘅不足之處，就係尚未把客戶盡職審查，以及備存紀錄規定納入法例同訂出相關罰則，金融監管機構嘅監管及執行權力有限等。為免落後於形勢，港府亦即時提出訂立《打擊洗錢及恐怖分子資金籌集（金融機構）條例》，並提出多項建議，包括金融機構可將客戶盡職審查，即係讓金融機構可確立每名客戶身份嘅措施，其中一項係針對「政治人物」，早前順利獲立法會通過。
橄欖個女都受牽連
本來打擊洗黑錢活動理所當然，只係怕有時矯枉過正，仲估唔到殃及政界中人添！一向投資有道嘅民建聯立法會議員陳鑑林（橄欖）話，佢女兒喺有關條例生效之前，曾經去過一間非中資銀行開設人民幣戶口，純粹作為投資之用，點知銀行已經因應法例即將生效而「查家宅」，當職員知道佢女兒老竇係陳鑑林時，就拒絕開戶。不過，佢女兒轉到中資銀行又成功開戶喎。
據聞亦有其他政界中人都遇過同類困難，只係冇同相關部門作出投訴啫。其實政界人士同其親屬都有投資上嘅權利，無理由因為佢哋係名人之後就畀人當成好似係洗黑錢或恐怖分子籌集資金而拒絕開戶，最多開戶手續繁複啲嘅啫。如果銀行方面過分緊張或者矯枉過正，分分鐘令客戶嫌麻煩將存款同投資都撤走，到時嘅銀行同金融機構真係喊都無謂喇！