有人歡喜有人愁，每年高級程度會考放榜，就知「讀書就是求分數」。雖然，功夫茶絕對唔認同純粹以成績論英雄，之但係香港嘅教育制度又的確相當之功利短視，所以呢，好難怪唔少名落孫山嘅學生傷心徬徨，將考唔上大學當成世界末日㗎。
嗱，今屆高考放榜有「四多」：第一，考生人數多，有四萬一千多人；第二，超級狀元多，四人考獲六Ａ驕人成績，手執五支火箭嘅亦有十七人；第三，成績符合升大學最低資格嘅人數多，有近一萬九千人，創近十四年新高。咦，咁係咪皆大歡喜呀？咁又唔係喎，事關第四多就係成績達標但係被拒諸大學門外嘅考生，有近七千人。
呢條數學題好簡單，本港大學學位只得約一萬二千個，喺僧多粥少下，大批莘莘學子大學夢碎，要另尋出路。至於其他二萬幾個名落孫山嘅考生，相信就更加徬徨嘞。你知啦，以前最常用嚟安慰落榜考生嘅說話，係條條大路通羅馬，意思係讀唔成大學，仲有好多其他出路，行行出狀元吖嘛。之不過香港嘅教育政策一塌糊塗，以前嘅羅馬大道依家統統變晒崎嶇難行嘅羊腸小徑，今時今日，除咗金融同地產，行行冇運行。落榜學生感到擔心徬徨，心情好容易理解㗎。
所以話啫，每年高考放榜，其實亦都係特區官僚收成績單嘅時候，學生嘅升學階梯係咪完備，就業出路係咪完善，一目了然，無所遁形。嗱嗱嗱，唔使問阿貴，年年咁多學生感到徬徨無助，個個驚住畢業等於失業，港府嘅教育政績梗係攞晒肥佬滿江紅啦！
就講副學士呢家嘢吖，對升讀大學無望嘅學生嚟講，本來係一條出路，但係好可惜，唔知港府係存心搵笨吖，定係眼高手低志大才疏，當年推出副學士後就關人個關，令副學士變成部分院校嘅生財工具，濫開課程，質素良莠不齊，學生報讀嘥錢嘥時間不特止，最慘係讀完課程無人請，畢業變失業，你都咪話唔淒涼。
副學士被人叫「掘頭進士」，即係讀完無出路，升讀大學困難，就業前景未卜，兩頭唔到岸。但係教育官僚竟然當時運高睇唔到，坐視學生任人魚肉，呢種官僚何只應該記大過，如果可以體罰，應該重打三十大藤添啦！
歸根究柢，香港教育咁失敗，皆因港府短視功利，毫無規劃。俗語話，十年樹木，百年樹人。十年前，港府就可以推說經濟低迷財赤嚴重啫，依家庫房水浸，港府窮到只剩低錢，點解唔可以投放更多教育資源，增加多啲大學學位？點解十年後仲要餵人食副學士呢塊雞肋？七千名夠分高考生有權向當局高呼：我哋唔要搵笨雞肋！
一句講晒，讀書就係求出路，唔該港府快快做好教育規劃，咪再令莘莘學子傷心徬徨嘞！嗱，自知懶散嘅官僚，就學古人懸樑刺股急起直追，如果腦袋遲鈍咯喎，咪食多啲豬腦、魚頭補吓囉，總之唔好再掟張烏厘單刀成績表出嚟丟人現眼嘞，年年肥佬，好醜㗎！