政情：政府跪慣建制派驚走唔切

煲呔曾○七年坐正後提出「強政勵治，福為民開」為施政綱領，但係大家都有眼睇㗎喇，夕陽政府呢一年多接二連三強推不得人心嘅政策，「跪低成性」，其中最經典嘅場面可算係二○一二政改方案，政府到臨表決前一個星期左右，先臨急臨忙轉軚接受白鴿黨嘅區議會改良方案，即時令到老早提出類似方案嘅建制派中人「生蝦咁跳」。

民記被動 恐兩面不是人

夕陽政府跣到建制派攤攤腰又點只政改呢一役呀，據聞連喺立法會擁有最多議席嘅民建聯，最近都有啲年輕成員覺得社會氣氛唔係好妥，開始為畀社會鬧爆嘅替補機制提早展開激辯，避免疑似畀夕陽政府唔聲唔聲跣多一鑊都唔知咩事。

據悉，有民記中人認為，佢哋依家個形勢好被動，一方面佢哋睇到好多建制派同道中人嘅投票意向一時一樣，極為飄忽，另一方面其他建制派又毫無戰意，完全「隱形」唔派人上陣同泛民主派搏火鬥講。

有人仲提早為未來把脈，講明下一個同夕陽政府嘅戰場，分分鐘係同啱啱坐正做商務及經濟發展局局長蘇錦樑（阿Greg）過招，因為阿Greg孭飛嘅《競爭條例草案》，依家畀商界鬧到飛起，民記對政府依家提出嘅競爭條例草案亦都唔係完全收貨，到時民記會唔會係兩面不是人，出現「撐又唔係，唔撐又唔係」嘅尷尬情況呢？

太早表態支持 歷史重演

夕陽政府視「民意如浮雲」，成日畀人逼到去牆角就「跪低」要佢哋執手尾，有建制派中人睇唔過眼，忍不住同夕陽政府放下狠話，講到明第時數夠票先叫佢哋支持，否則擔心佢哋嘅支持只會成為政治代價嘅墳墓喎。

如果建制派係「醒水」嘅，更加應該睇實嚟緊煲呔曾任內最後一份施政報告，千祈唔好太早表態支持，否則走避不及，又會繼續重演。

今明兩年都係選舉年，建制派如果醒目，就唔應該對民望剩番無幾多嘅夕陽政府再抱有幻想，一切還是自求多福罷喇！