政情：袁國勇籲醫生戒「快餐」
香港生活節奏快，連醫生睇病都要快。不過香港大學醫學院微生學系系主任袁國勇就話「唔應該連醫療都係快餐文化，呢個係唔理想。」又話雖然病人多，醫生都唔應該睇一、兩分鐘就算，應該花多啲時間向病人了解病情，咁樣病人覺得被關心，做醫生嘅又有滿足感喎。
袁國勇曾經喺西雅圖嘅醫院做研究。佢話嗰度啲醫生睇每個新症都要用一個鐘以上。佢好記得有一個病人，係做骨髓移植嘅韓國細路仔，個細路仔話自己周身唔舒服又持續低燒。袁國勇發現佢瞓覺時淨係側去右手邊，佢好想知道點解。個細路就話，因為左邊隻耳仔會唔舒服。袁國勇發現佢耳仔腫咗，檢查後原來係嚴重真菌感染，好彩做醫生嘅夠細心，如果唔係，個細路有可能失去聽力。後來返到香港，袁國勇有次都係因為佢鍥而不捨，先發現血癌病人集體腸道真菌感染係因為藥物污染。
其實袁國勇自細已經鍾意尋根究柢，「我鍾意問點解，對好多嘢好奇」，佢細個仲因為鍾意睇星星，諗過長大後做太空人添。