中環出更：「爆冷」退役四太依依不捨
多次揚威國際賽事嘅賭王何鴻燊名駒「爆冷」，六月八日宣告退役。主人四太梁安琪尋日聯同一班馬會高層，喺沙田馬場為「爆冷」開歡送Party，「爆冷」現身亮相，繞場一周同馬迷Say goodbye，四太依依不捨，影相一刻目不轉睛地望住「爆冷」，難捨難離。
共贏逾8000萬獎金
現年九歲嘅「爆冷」，吸水力驚人，出賽至今，勝出十三場頭馬，帶挈主人袋逾八千三百多萬元獎金，係歷來贏得最多獎金嘅本地馬。「爆冷」身價，當日只係過千萬元，屈指一算，回報勁和味。但四太就講心唔講金，坦言養馬非為賺錢，「爆冷」每次奪標，全家上下開心到震，佢亦自覺同「爆冷」好有緣。
「爆冷」腳頭好，退休後繼續做「上等馬」，先入住上水雙魚河騎術學校休息一年，適應後再移居新西蘭或者澳洲。「爆冷」繞場一圈作道別，馬迷起哄拍掌，賭王冇入場，但亦唔捨得「爆冷」，尋日諗住入場望多佢兩眼，但最後怕勞師動眾，放棄入場。
講番馬場賽事，叙福樓集團執董黃傑龍（Simon），同立法會議員張宇人（Tommy）等人夾份嘅團體馬「好食德」爆驚喜，勝出第三場頭馬。可惜Simon同Tommy各有各忙，錯失拉頭馬機會。Simon話，「好食德」係第二次出賽，冇諗過咁勁，所以一蚊都冇落注，夠晒揼心。
馬會尋日搞搞新意思，擺放模型馬，供會員一嘗拉頭馬滋味，馬會大董周永健走去影張相，沾吓好運。周Sir尋日派愛駒「偉感」與「同感」出戰，可惜分別跑第三及第二，無緣拉真正頭馬。
卓妮